XASAN KHEYRE oo ninkii Siyaasadda ku soo barbaariyay ku eedeeyay Maamul xumo

0
254

Ra’iisul wasaare Xasan Cali Kheyre ayaa ka hadlay kororka dhaqaalaha soo gala dowladda Soomaaliya iyo hoos u dhaca deymo uu sheegay in lagu lahaa dowladda Soomaaliya.

Xasan Cali Kheyre ayaa sheegay in maalinta uu imaanayay xafiiska, in dowladda Soomaaliya lagu lahaa 100 Milyan oo deyn ah, deyntaasi oo uu ku sheegay inay ahaayeen mushaaraadka ciidanka oo la bixin waayay iyo qandaraasyo shaqsiyaad loo saxiixay.

Sidoo kale ra’iisul wasaaraha ayaa sheegay in lacagtaasi lagu yeeshay dowladihii ka horeeyay, balse labadii sano ee lasoo dhaafay dadaal dheer kadib iyaga ay bixiyeen dhamaan deymahaasi, sida uu hadalka u dhigay.

“Maalintii aan nimid ilaa iyo hadda dowladda majirto cid deyn ku leh, markaan nimid 100 oo deyn ah ayaa lagu lahaa, oo lagu lahaa dowladihii naga horeeyay, kuwaasi oo ah mushaar la bixin waayay ama cid qandaraas la siiyay oo lacagteeda la siin waayay, waxaana bixinay 100 Milyan oo dowladihii hore lagu lahaa oo sidii ay tahay aan loo maamulin” ayuu yiri Ra’iisul Wasaare kheyre.
Hadalkaan ayuu ka jeediyay kadib kulan uu la qaatay ganacsatada Soomaaliyeed oo uu kala hadlayay sidii loo horumarin lahaa dhaqaalaha dalka iyo bixinta canshuuraha ay bixiyaan ganacsatada Soomaaliyeed.

Dhinaca kale Ra’iisul wasaare Kheyre ayaa soo hadal qaaday sharuudaha deyn cafinta Soomaaliya, wuxuuna sheegay inay marayaan meeshii ugu wanaagsaneyd oo looga cafin lahaa deymaha dalalka caalamka ku leeyihiin Soomaaliya.

Hadalka Ra’iisul Wasaaraha Soomaaliya ayaa kusoo aadaya xilli todobaadyadii la soo dhaafay oo shalay ay ugu dambeysay ay jireen Ciidamo ka cabanaya mushaar la’aan,kuwaas oo sheegay in mudo 4 Bilood ah aysan qaadan.

LEAVE A REPLY

Please enter your comment!
Please enter your name here